الخطّ الأحمر _ محمد عز العرب خليفة
يا صاحبي الحدود مش قساوة ولا سد
دي سور الجنينة اللي بيحمي الورد
عشان نفضل حبايب والود يدوم
لازم يكون فيه مابيننا أصول وحدّ
أولاً.. في المشاعر خلّي بالك
متشلش شيلة غيرك وتتعب حالك
اللي يرمي حمله ويقول "أنا زعلان"
قوله مشاعرك تخصك.. وأنا مالي ومالك؟
والجسم له حرمة ومساحة وأمان
مش لازم تلمسني عشان تبان
لو مش مرتاح للسلام أو الأحضان
من حقك ترفض.. وتنام في اطمئنان
وعقلك ده ملكك.. وفكرك ده حر
محدش يسخف ورأيك يمر
معتقدك غالي.. وفهمك ده نور
ومينفعش حد في كلامك يجر
ووقتك ده عمرك.. أغلى ما فيك
مش أي حد ينادي.. تروح تجريك
لو وقتك لنفسك.. قفل موبايلك
وقول "مش متاح".. وده حق ليك
ومالك ده عرقك.. وتعب السنين
متجاملش حد وأنت اللي حزين
لو مش هتقدر.. متضغطش روحك
مش فرض تسلّف كل العشمـانين
وفي الشغل برضه.. افصل ما بين
مجهودك وحقك.. وعيش مستعين
متسمحش لمدير يستغل الساعات
ولا حد يكسر بخاطرك.. يا زين
حتى في أهلك.. فيه حب واحترام
بس القرار لك.. في كل الكلام
حبهم على راسي.. بس دي حياتي
والشورى رحمة.. مش فرض واستسلام
وأكلك.. وصحتك.. وهواية بتحبها
محدش يحاسبك.. ولا تعتل همها
لو غاوي حاجة والناس شايفاها "عجب"
انبسط بيها.. ولازم تفهمها
إزاي تحط الحدود؟ اسمع نصيحتي:
كلمة "لأ" في وقتها.. هي راحتي
خليك واضح.. وصريح.. وبكل ذوق
ومتحسش بذنب.. دي قمة صراحتي
لو حاسس بضغط.. أو ضيق.. أو ملل
أو حد بياخد مجهودك.. بخلل
اعرف إنك محتاج "خط أحمر" قوام
عشان تعيش صح.. وتداوي العلل
بقلم
السيد محمد عز العرب خليفة
مصر
اضف تعليقاً عبر:
الابتسامات