قعدة هناك _ زينب الرفاعي
و لقيتها بتضحك لي
و تقولي تعالى اشرب معايا الشاي
كأني بيني وبينها معاد
حسيت إنها مجنونة
لكن لما قربت منها لقيتها حنونة
و عيونها فيها مليون حدوتة
كأني أعرفها من زمان
رسمت أحلامي بعيونها
و رموشها كانت الألوان
رجعت لي شبابي
بعد فوات الأوان
قلبي تعلق بها
و عزف على صوتها ألحان
و كلامها كله أشعار
على السطر موزون
كأن هواها ليا موصوف
حلفت بحياتي إن لحبها هصون
و فضلنا نكلم بالساعات
كأنه عمر طويل
إتلخص في لحظات
و بدأت تحيِ فيا أجمل ذكريات
كأني مراهق في الخريف
قولت هى دي حبيبتي
إللي بدور عليها من عمر فات
هى إبتسامتي في عمري الجاي
و فجأة بتقولي سلام
أتاريها كانت أحلام
صحيت على وهم
خلاني أشوفها في كل العيون
خفت يقولوا عليا مجنون
مقدرتش أنساها
و كل يوم أستناها
في نفس المعاد
أتخيلها و هى قعدة هناك
بتضحك لي
وتقولي تعالى إشرب معايا الشاي
بقلمي
زينب الرفاعي
اضف تعليقاً عبر:
الابتسامات