اسكندريّة _ عبد الرحيم علي
يا عروسة يا اسكندرية
ع البحر والبحر رايق
ياما قالوا عنك ماريا
وحبيبها ع الشط عايق
على شطك الريح يعدّى
شايل معاه النسايم
ولا حد فى الدنيا قدّى
ع الشط ع الكرسى نايم
كل الحبايب بشطّك
بالحب واقفين سكارىٰ
سبحانه ع البحر حطك
يتهنوا فيكى الحيارىٰ
عديت على الشط ياما
ما لقيت على الشط حاير
لكن لقيت العلامة
وفى العيون البشاير
يا عروسة والكل حبّك
يعشق فى بحرك سكونه
ولا حد فى الدنيا قدك
ولا بحر فى الدنيا لونه
يا عروسة تعشق حبيبها
والعشق بينكم أصاله
بالعافيه مين قال يسيبها
والحب فى القلب حاله
ياما جاكى ع الرزق يسعى
رومى وفرنسى ويونانى
يا جنينة بالحب واسعة
تحضن جميع الامانى
وكثير مداين على اسمك
وما حد في الدنيا زيك
وعشان جمالك ورسمك
سموا المداين على اسمك
يا سابقه عصر المداين
فى العلم ،والدنيا نايمه
وفنار بيهدى السفاين
ب انوار على البحر عايمه
فيكِ اللى غنى لحبيته
ورسم على الشمس قلبك
فيكى اللى حبّوه لطيبته
ولا حب فى الدنيا قدك
درويش بيجرى فى وريدك
قوم غنى يا مغنواتى
ده القلب ماسكاه بإيدك
والكل سهران ليلاتى
بيرم ومين زى بيرم
فى هواكى ألّف غناوى
سيد ومين زى سيد
افهمنى ياللى أنت غاوى
درويش وشايفك حورية
فى المية وقت المغارب
ولا همة فى العشق ميّة
وعمل من القلب قارب
فى القلعة ياما التقينا
على شط حبك قهاوى
م البهجة تلمع عينينا
ع الشط فنان مخاوى
يا جميلة يا اسكندرية
عشقك جميع الخلايق
من روما والبندقية
و اثينا عشقك وجالك
ايه اللى فيكِ سحرهم
يا حلوه يا مجننانى
لا فريسكا باللوز وبندق
ولا حتى طعم السودانى
لاجلن عيونك ل اجيلك
ع الشط وافرد قلوعى
قومى شدى يا حلوه حيلك
دانا قلبى فارق ضلوعى
صياد فى بحرك صادونى
وانا قلبى صياد وغيّة
غريق يا خلق ألحقونى
وانا فيكى يا اسكندرية
كلمات
عبد الرحيم على
اضف تعليقاً عبر:
الابتسامات