قلم وألم _ حليم محمود أبو العيلة

 قلم وألم

انا   وألـمـي  وشـويـة  ورق 

وحاجات  جوانا  محـبوسـة

وقلم بيغزل ذكريات وحنين

وآهات ف القلب  محسوسة

وأحلام  مبدورة  ف  خريف

وخطاوي معادتش مدروسة

جناين طرحت شوك وسراب

وعيـون  حسودة  مدسوسة

وكفــوف  صوابعها  مبتـورة

ونفــوس  ضـلمة  منحوسـة

وعـواطف  خجلانة  مكبـوتة

وأحاسيس منقوطة مفروسة

أشجار  دبلت  وطالها العطب

وبات  فيها  العفن  والسوسة

وألسنة  كانت ببغان ف الحق 

دلوقتي  مبحوحة  مخروسة

                  كلماتي:

الشاعر: حليم محمود أبوالعيلة 

مصر